കവിയുടെ കണ്ണ്‍

കവിയുടെ കണ്ണു

കുലീനയാം കന്യകയേക്കൂടി

വിവസ്ത്രയാക്കുന്ന

അസന്മാര്‍ഗി. 

വേശ്യയുടെ 

മദാലസതയില്‍ക്കൂടി

മാതൃത്വം തിരിച്ചറിയുന്ന 

സൂചിമുന.

 1993

കാമുകന്‍റെ സ്ഥാനം

ചങ്ങലക്കണ്ണികളില്ലാത്ത,

തടവറച്ചുമരുകളോ

കാവലാളുകളോ ഇല്ലാത്ത,

എന്തിനധികം

ദിക്കുകള്‍ പോലും

അതിരുകളായില്ലാത്ത

ഭ്രാന്തിന്‍റെ

കടുംനിറങ്ങള്‍ക്കിടയിലത്രേ

കാമുകന്‍റെ സ്ഥാനം. 

1996 മെയ്‌

മാതൃചിന്തകള്‍

 ഒന്ന്‍.

എന്‍റെ അമ്മയ്ക്ക്‌ ഉണ്ടായിരുന്നത്‌

രണ്ട്‌ കര്‍ക്കിടക കണ്ണുകളായിരുന്നു. 

പെയ്തൊഴിയാത്ത

ആ കണ്ണുകളില്‍ നിന്നും

തൊണ്ടവരണ്ട

ബലികാക്കയെപ്പോലെ

ഒരു നോട്ടം 

എനിയ്ക്ക്‌ പിന്നില്‍ എപ്പോഴുമുണ്ടായിരുന്നു. 

ഇടവപ്പാതിയിലെ പ്രളയത്തിലെന്നവണ്ണം

ഞാനതില്‍ മുങ്ങിച്ചാകുമെന്ന്‌ 

ഭയന്നിരുന്നു.

ബഢവാഗ്നി കണക്കെ

അമ്മയുടെ നെഞ്ചിലെ ചൂട്‌ 

എന്‍റെ തലച്ചോറിലേയ്ക്ക്‌ 

തീകൊടുത്തിരുന്നു. 

രണ്ട്‌.

ഒരു സാംസ്കാരിക ഘോഷയാത്ര

ആയിരം കാലുള്ള തേരട്ടയെപ്പോലെ

  എന്‍റെ കണ്ണിലേയ്ക്ക്‌ അരിച്ചുകയറുന്നു.

അവര്‍ ഒരമ്മയെ പ്രദര്‍ശിപ്പിച്ചിരുന്നു. 

ചുംബനം മുറ്റിയ അമ്മയുടെ ചുണ്ടില്‍

അവര്‍  

വിഷ ചഷകം കമഴ്ത്തിയിരുന്നു.

ജീവന്‍ ചുരന്നിരുന്ന മുലകളില്‍ 

എന്നേ ഖനനം നടത്തിയിരുന്നു.

കുഴിച്ചെടുത്ത ഇരുമ്പ്‌ ഉരുക്കാക്കി

അവര്‍ 

അമ്മയുടെ ചാരിത്രം താഴിട്ടുപൂട്ടിയിരുന്നു.

ഇവര്‍ക്കിങ്ങനെ പ്രദര്‍ശിപ്പിയ്ക്കാനായി 

അമ്മ 

എന്തിനിങ്ങനെ ജീവിച്ചിരിയ്ക്കുന്നു!?

മൂന്ന്.

അമ്മയുടെ കര്‍ക്കിടക കണ്ണുകളില്‍ നിന്ന്‌ 

തൊണ്ട വരണ്ട ബലിക്കാക്കയെപ്പോലെ 

ദൈന്യമായ.....

എനിയ്ക്കീ പ്രളയത്തില്‍ 

മുങ്ങിച്ചാകാതെ വയ്യ. 

ഈ ഉമിത്തീയില്‍ 

നീറാതെയും വയ്യ.

2001

കര്‍മ്മഫലം

അജ്ഞന്‍റെ  മര്‍ദ്ദനവും

ജ്ഞാനിയുടെ സഹനവും

തമ്മില്‍ തീരാപ്പോര്‌

ജ്ഞാനിയ്ക്ക്‌ നിത്യശാന്തി

അജ്ഞനോ

ഭാരിച്ച വാഴ്ചയും 

1996

കറണ്റ്റ്‌ അഫയേഴ്സ്‌

കറണ്റ്റില്ലാക്കാലം

ലെയിനടിയില്‍ തോറ്റ്‌

കവി യൌവ്വനം

തൂങ്ങി മരിച്ചു.

കറണ്റ്റ്‌ വന്നപ്പോഴോ

ലെയിന്‍ കമ്പിയില്‍ തൂങ്ങി

കാക്കകള്‍ മാത്രം

കാരണമില്ലാതെ ചത്തു.

2004

വേനല്‍

വയസ്സ്‌ പതിന്നാല്‌

വെളുത്തനിറം നാലടി രണ്ടിഞ്ച്‌

ഇംഗ്ളീഷും മലയാളവും.

സൂര്യന്‍ തിളയ്ക്കുന്ന

ആകാശത്തിലേയ്ക്ക്‌

ഇലയില്ലാതെ ഉയര്‍ന്നുപോകുന്ന മരം

ആര്‍ത്തലച്ച്‌ ചോദിയ്ക്കുന്നു

ഇവരൊക്കെ പോകുന്നത്‌ എവിടേയ്ക്കാണ്‌?

ഉത്തരം പറയാനൊരുങ്ങിയ

പബ്ളിക്‌ ടാപ്പിണ്റ്റെ

തൊണ്ട വരണ്ടു

1994

സര്‍ക്കാര്‍ പഠിച്ച പാഠം

മെഡിക്കല്‍ അഡ്മിഷന്‍ കിട്ടാതെ

ക്രിസ്തു

തൂങ്ങിമരിച്ചത്‌

അള്‍ത്താരയില്‍.

സഭാനേതൃത്വം

തിരുശവവും പേറി

നിയമസഭയ്ക്കു മുന്നില്

‍സമരത്തോടുസമരം.

ഒടുവില്‍

കുഞ്ഞാടുകളില്‍ നിന്നും

കോഴ വാങ്ങുന്നത്‌

ദൈവഹിതമെന്നും

അത്‌

മനുഷ്യരുടെ കോടതിയ്ക്ക്‌

തടയാനാവില്ലെന്നുമുള്ള

പാഠം

സര്‍ക്കാര്‍ പഠിച്ചു

2007